/p. 237/ cogitationum velocitas animique celeritas atque
ingenij varietas multiformes notas imprimit
cum caeteris animantibus animi fere
sint immobiles stabilesque atque in suo cuique
genere similes». Quo fit ut mulieris imaginatio
alienam formam atque ascititiam effigiem
infanti inducat, nullaque in parte gignenti similem,
quare inefficax est argumentum quod
in designando parente ex similitudinis ratione
sumitur. Novi mulierem quae extra legitimum
thorum se alteri prostituit et infantulum enixa
est non adulteri, cuius furtivo usa fuerat concubitu,
sed absentis mariti prorsus similem,
quia dum coniugalem maculabat thorum, de
marito sollicita erat, metuens ne illius adventu
fraus detegeretur. Alex. – At quomodo
imaginatio tam varias rerum formas potest
infanti imprimere? I. C. – Semen ad procreandam
sobolem est inefficax, nisi a spiritibus per totum
corpus diffusis informetur; qui spiritus cum
toti sint ad formandum fingendumque foetum
conversi, ideo vehemens fixaque mulieris cogitatio
visae vel concupitae rei species vehementer
movet et versat et figuram, quam assidua
imaginatione revolvit, spiritibus imprimit,
qui sic affecti eiusdem cogitatae rei figuram semini
inducunt, semen autem foetui. Alex. – Sed quamobrem
mulieres, ne exoptatae rei notas
pueruli faciem commaculent, remotiori corporis
parti manum admovent, vel faciem manu
abstergunt, atque his modis vel contactae secretiori
parti nota infigitur, vel malum prorsus